قسم علی asked 5 years ago
جناب آپ سے عرض یہ کرنا تھا کہ کچھ دنوں پہلے مجھے واٹس ایپ پر ایک میسج موصول ہوا تھا جس میں یوٹیوب چینل کی لنک تھی، اور اوپر لکھا تھا دجال دنیا میں آگیا اور قیامت کی تقریبا تمام نشانیاں پوری ہوچکی، میں نے اس لنک پر جاکر ان کے تقریبا تمام ویڈیو دیکھے جس کے اندر قرآن اور حدیث سے دجال کو، دابّه من الارض، دخان، سورج کا مغرب سے نکلنا، زمین سے آگ کا نکلنا، فرات سے سونے کا پہاڑ، غزوہ ہند، یاجوج ماجوج اور بہت کچھ ایسا ثابت کیا گیا کہ اس کا رد نا ممکن نظر آیا، میں نے جب سے ویڈیو دیکھا تذبذب کا شکار ہوں، میرے کئی دوست اس کو صحیح مان چکے، فیس بک اور سوشل میڈیا پر یہ دعوت زور و شور سے چل رہی ہے ، اور ان کا دعوی ہے کہ 2019 میں القارعہ یعنی عالمی ایٹمی جنگ ہوگی جس میں 80% لوگ مارے جائیں گے، میں نے علماء سے اس بارے میں بات کی کوئی تسلی بخش جواب نظر نہیں آیا رد کی بات تو دور کی ہے، بہت لوگ اس کے پیچھے جارہے ہیں، اور بہت پڑھے لکھے لوگ ان کی طرف راغب ہو رہے ہیں ان راغب ہونے والوں سے بھی رابطہ کیا اور ان سے کہا کہ اس معاملے میں پہلے علماء سے رجوع کرو تو ان کا جواب بھی یہی آیا کہ علما اس کا جواب دینے سے قاصر ہیں رد تو دور کی بات ہے، میں آپ کو اس لئے آگاہ کر رہا ہوں کہ آپ اس کو ایک بار دیکھیں، اور اسکے بارے میں رہنمائی کریں، ہوسکتا ہے وہ علماء مصروفیت کی وجہ سے رد نا کر سکے ہوں، اور مجھے جیسے ہی اس کا علم ہوا تو میں نے آپ اہل علم کو اس سے آگاہ کیا، میں نے میری ذمہ داری پوری کی اب آپ پر ہے کہ اس کو جانیں، پرکھیں پھر اس کے بعد عوام کو آگاہی دیں، ورنہ آپ جوابدہ ہونگے۔
Mufti Shahid Iqbal answered 5 years ago
الجواب
قیامت کی علامات کبریٰ ابھی تک پوری نہیں ہوئیں جیسا کہ دجال کا آنا، دآبۃ الارض کا نکلنا، یاجوج ماجوج کا نکلنا اور سورج کا مغرب سے طلوع ہونا وغیرہ
۲۔ وقوع قیامت کے لیے ان علامات کا بعینہ پورا ہونا ضروری ہے نہ کہ ان علامات کو کسی دوسری چیز پر قیاس کرنا جیسا کہ دجال سے دجالی فتنہ مراد لینا۔
۳۔ 2019 میں عالمی ایٹمی جنگ کا ہونا اور اس سے قیامت کا مراد لینا بالکلیہ غلط ہے۔ اس لئے کہ اس بات کا علم کہ قیامت کب آئی گی جناب نبی کریم صلی اللہ علیہ وسلم کو بھی نہیں تھا جیسا کہ حدیث جبرائیل کے اندر ہے کہ حضرت جبرئیل علیہ السلام نے حضور علیہ السلام سے سوال کیا، فاخبرنی عن الساعۃ قال ما المسئول عنھا باعلم من السائل۔۔۔۔۔۔الخ
مشکوٰۃالصابیح ج1 ص12
۴۔ القارعۃ سے اشارہ اگر سورۃ القارعۃ کی طرف ہو اور اس سے عالمی ایٹمی جنگ مراد لی جا رہی ہو تو یہ بات ذہن میں رہے کہ اس سے عالمی ایٹمی جنگ مراد لینا بالکل غلط ہے اور ایک قسم کی قرآن پاک میں تحریف معنوی لازم آتی ہے اور ایسی تاویل کرنا قآن پاک میں نا جائز اور حرام ہے کیوں کہ القارعۃ جو سورت نمبر101 اور پارہ نمبر 30 کے اندر ہے اس سے مراد قیامت ہے اور اس سورت کےاندر قیامت کی منظر کشی کی گی ہے۔
واللہ الموفق
دارالافتاء مرکز اھل السۃ والجماعۃ سرگودھا پاکستان
تاریخ13/11/2018ء
Please login or Register to submit your answer
